හාල් නැති වුණොත් මංඤොක්කා-මුං-බතල කන්න පුරුදු වෙන්න! පිළිකාවලටත් හොඳයි! 

ඉදිරියේදී රටේ හාල් හිඟ වුවහොත් මඤ්ඤොක්කා, මුං, බතල කෑමට ජනතාවට හුරු වීමට සිදුවෙන බව වාරිමාර්ග අමාත්‍ය චමල් රාජපක්ෂ පවසා ඇත.

අතීතයේ ගම්වල ජනතාව වැඩි වශයෙන් මඤ්ඤොක්කා වැනි දෑ ආහාරයට ගැනීම හේතුවෙන් පිළිකා තත්ත්වයන් අවම කර ගැනීමට ද හැකි වූ බවත් ඒ මහතා පවසා ඇත.

නොවැම්බර් 01 දින   දළදා යල් අස්වනු පූජාවෙන් අනතුරුව මාධ්‍ය වෙත අදහස් දක්වමින් ඔහු මේ බව පවසා ඇත.

“ලංකාව පුරා ගොවි සංවිධාන පසුගිය කන්නයේ නෙළාගත් අස්වැන්නේ අග්‍රකොටස දළදා වහන්සේට පූජා කිරීම වාර්ෂිකව සිදු කරනවා. මහ කන්නයේදී සාර්ථක අස්වැන්නක් අපේක්ෂාවෙන් ගොවීන් දළදා වහන්සේ උදෙසා මෙම පූජාව සිදු කරන්නේ ඉතාම ගෞරවය පෙරදැරිවයි. මමත් ගොවියෙක්. මම කාබනික පොහොර යොදල වගා කරමින් සිටිනවා. අලූත් අයට මෙය අලූත් අත්දැකීමක්. මෙය දිගින් දිගටම කරගෙන යද්දි සාර්ථකව කරගත හැකි වෙයි. පළමුවන කන්නය අත්දැකීමක් අස්වැන්න අඩු වුණොත් සහතිකයක් දීල තියෙනව අලාභයක් විදිහට වන්දියක් ගෙවනව කියල. ඒකට බයවෙන්න දෙයක් නැහැැ. හැම උද්ඝෝෂණයකම පසුබිමේ දේශපාලනයක් තියෙනවා’

‘සියලූ දෙනාගෙම වගකීම වසවිසෙන් තොර ආහාරයක් ජනතාවට දෙන්න ඕන කියන එක. අප බලන්න ඕන ජනතාවට ගුණාත්මක වස විසෙන් තොර ආහාර ලබා දෙන්න. ඉස්සර කෑ ගැහුවෙ බහුජාතික සමාගම් එපා කියල. දැන් කියන්නේ රසායනික පොහොර ගන්න එයාලව තියාගන්න කියලා. මේවා අපි කල්පනා කර බලන්න ඕන.’

‘අපේ බිමේ මඤ්ඤොක්කා හොඳට වැවෙනවා. දේශීය අල වර්ග 60 කට වඩා තිබෙනවා. මුං ඇට, කව්පි වගේ බෝග තිබෙනවා. මේවා ආහාරයට ගැනීමට අපි පුරුදු වෙන්න ඕන. රසායනික පොහොරවලට අපේ සල්ලි යනව. දෙගොල්ලනම මේ සඳහා කැපවීමක් කරන්න අවශ්‍යයි. හාල් හිගයක් දැනුත් තියෙනව. අඩු ආදායම්ලාභීන්ට දැනුත් හාල් කොච්චර තිබුණත් රටින් ගෙන්වන්න හදනව අඩු ආදායම් ලාභීන් පිළිබඳව කල්පනා කරනව ඒ අයට අඩුව හාල් දෙන්නෙ කොහොමද කියල අපි සැලසුම් සකස් කරනවා.’