යුගදනවි ගිවිසුම ගැන හංගන්න දෙයක් නෑ! අත්සන් කළේ දෙපැත්තටම පහසු වෙලාවක!

ටෙන්ඩර් කැඳවීමකින් තොරව කෙරවලපිටිය යුගදනවි විදුලි බලාගාරයේ කොටස් 40% ක් ඇමරිකානු සමාගමට ලබා දුන්නේ ඒ සමාගමට මේ වයාපෘතිය සිදු කර ගෙන යන්න පුළුවන් ශක්තිමත් සමාගමක් නිසා බව විදුලිබල අමාත්‍ය ගාමිණි ලොකුගේ මහතා පවසා ඇත.

අදාල සමාගමට යුගදනවි විදුලි බලාගාරයේ කොටස් 40% පවරමින් ගිවිසුමක් අත්සන් කළ බව ඔහු පවසා ඇත.

ඔහු මේ බව පවසා ඇත්තේ සැප්තැම්බර් 23 වෙනි දින පැවැති මාධ්‍ය සාකාච්ජාවකදීය.

මැදියම් රාත්‍රියේ මෙම ගිවිසුම් අත්සන් කිරීම පිළිබඳව ඒ මහතාගෙන් විමසූ විට ඔහු පවසා සිටියේ

“ඒක කොයි වෙලේ අත්සන් කරනවද නැද්ද නැහැ. දෙගොල්ලන්ට පහසු වෙලාවක තමයි අත්සන් කරන්නේ. මේක අපි නොදැන නෙමෙයි කළේ. කැබිනට් පත්‍රිකා ගෙනල්ලා, අපිට ඒ පිළිබඳව දැනුවත් කරලා, අපේ එකඟතත්වයෙන් තමයි අපි ඒක කරන්න අවසර දුන්නේ. මේ ගැන සුළු පක්ෂ කැබිනට් මණ්ඩලයේදී දැන් කරන චෝදනාව ඉදිරිපත් කරලා නැහැ. හැම බඩුවකටම ලෝක වෙළඳ පොළේ මිලක් තියෙනවා. ඒ මිලට වැඩියෙන් යන්න බැහැනේ. මෙතෙන්දී ඒකාධිකාරියක් හිමි උනාට හැම දේකටම ලෝකේ සම්මත මිලක් තියෙනවා. රජයේ අවසරයක් ගන්නේ නැතුව මුකුත් කරන්න බැහැ. ස්වාභාවික ගෑස් කියන එක පොඩි කටයුත්තක් නෙමෙයි. එහෙම සමාගමක් මෙහෙ ඇවිල්ලා ගෑස් ටැංකි දැම්මොත් අපිට ඒකෙන් ගන්න එක තමයි ලාභ. ඉතින් අපි ගිවිසුමට ඇතුල් කරලා තියෙනවා තව බලාගාරයක් ඇති කළොත් අනිවාර්යයෙන් අපිට ගෑස් සපයන්න ඕනේ කියලා. මෙච්චර වාසියක් තියෙද්දී වෘත්තීය සමිති, ආණ්ඩුවේ හවුල්කාර පක්ෂ විරෝධයක් දක්වන්නේ ඇයි කියන එක අපිටත් ප්‍රශ්නයක්. අපේ මැතිවරණ ප්‍රකාශනය කියවලා බලන්න. බොහෝම පැහැදිලිව අපි කියලා තියෙනවා රජයේ සහ පුද්ගලික අංශයේ එකාබද්ධව වැඩපිළිවෙලක් අපි ආරම්භ කරනවා කියලා. ඒක මැතිවරණයට කලින් ඉඳලා අපි කිව්වා. අපි හැබැයි විදුලි බල මණ්ඩලය සම්පුර්ණයෙන් විකුණලා දාන්නේ නැහැ. අපිට ඩොලර් හිඟයක් තියෙනවා. ඒක බොරුවක් නෙමෙයිනේ. අපිට ඩොලර් ලැබෙනවා නං අපි ඒ ගැන තවත් සැලකිලිමත්ව බලන්න ඕනේ”

“අමෙරිකන් සමාගමක් ඉදිරිපත් වෙලා ඉල්ලුවා. ඒගොල්ලන්ට 40%ක් දුන්නා. ඒකේ සම්පූර්ණ ලාභය එන්නේ ආණ්ඩුවට. අවුරුදු 15කට පස්සේ රජයට මේක අයිතිවෙනවා. අත්සන් කරලා තියෙන්නේ. ඒක හංගන්න දෙයක් නෑ”