පුෂ්පිකා සමාවෙන්න!

ලොහාන් රත්වත්තේ ඇමතිවරයා සමඟ වැලිකඩ බන්ධනාගාරයට ගිය බවට සෘජුව හා වක්‍රව තමන්ගේ නම පළවීම ගැන පුෂ්පිකා ද සිල්වා මහත්මිය නිවේදනයක් දාලා.

ඒ නිවේදනයේ උක්ත බන්ධනාගාර සිදුවීම ගැන කිසිම සෘජු සඳහනක් නෑ. ඇය එලෙස බන්ධනාගාරයට නොගිය බව, එදින තමා කිසිවකට සම්බන්ධ නොවූ බව ඒ නිවේදනයේ නෑ.

ඒ වෙනුවට ඇය කියා තිබෙන්නේ මේ දිනවල තමන් ගැන අසත්‍ය ප්‍රවෘත්ති පළවෙන බව. තමන් දේශපාලනඥයෙක් වෙනුවෙන් පෙනී නොසිටින බවත් එහි සඳහන්.

ඒ කෙසේ වෙතත් මේ සිදුවීම්වලදී සීමාව ඉක්මවා ඇය ඉලක්ක වීමක් පෙනෙන්නට තිබුණා. ඇය හෝ වෙනත් නිරූපිකාවක මේ සිදුවීමට සම්බන්ධ වුණත් නැතත් වඩා වැදගත් වන්නේ රාජ්‍ය අමාත්‍යවරයාට එරෙහි චෝදනාව. සිරකරුවන් දෙන්නෙක් දණගස්වා පිස්තෝලය තැබීමේ චෝදනාව.

ඒ කෙසේ වෙතත් ලිංගික අසහනයෙන් පෙළෙන අපේ සමාජයට විශාලම ප්‍රවෘත්තිය වී ඇත්තේ නිරූපිකාවගේ කතාව. චූදිතයන් අතරින් වුව කාන්තාවන් වැඩිපුර ඉලක්ක කරන්න අපේ සමාජය කැමතියි

අපිත් යම් දුරකට මුලින් ප්‍රවෘත්තිය වීඩියෝවකින් කියද්දී යම් මට්ටමකට නිරූපිකාවක් ගැන කොටස ඉස්මතු කළා. ඒ ගැනාපිත් සමාව ඉල්ලනවා.

ඇගේ නිවේදනය පහතින්,

සියලුම මාධ්‍ය ආයතන සහ මා ආදරණීය හිතවත් ශ්‍රී ලාංකික ජනතාව වෙත කරන විශේෂ දැනුම් දීමකි.

හිතවත් මහත්මයාණෙනි/ මහත්මියනි,

මෙම විශේෂ සටහන තබන්නේ මේ දිනවල වක්‍ර ආකාරයෙන් මා සම්බන්ධ කොට ප්‍රචාරය වන අසත්‍ය ප්‍රවෘත්ති සම්බන්ධයෙනි.

පුෂ්පිකා ද සිල්වා වන මම, මේ රටේ පැවති විවාහක රූ රැජින තරගාවලියේ දී විවාහක රූ රැජිණ ලෙසින් කිරුළ පැලඳුවෙමි. ලබන වසරේ මුල ඇමරිකාවේ las vegasහි පැවැත්වීමට නියමිත ලෝක විවාහක රූ රැජින තරගය සඳහා සූදානම් වෙමින් සිටිමි.

මෙය, ගරු රෝසි සේනානායක මැතිණිය රැගෙන ආ විවාහක රූ රැජින කිරුළ මා විසින් යලිත් අප රටට ගෙන ඒමට ඉතාමත් දුෂ්කරතා මධ්‍යයේ පුහුණු වීම් කරමින් සහ එක් දරු මවක් වශයෙන් මගේ දරුවාගේ සියලු කටයුතු නොපිරිහෙලා ඉටු කරමින් සිටින අවස්ථාවකි.

ඒ අතර මේ දිනවල පවතින covid 19 වසංගතය සඳහා සෞඛ්‍ය ආරක්ෂිත ක්‍රියාපිළිවෙත් අනුගමනය කරමින්, උපකාර කළ යුතු ජනතාව වෙනුවෙන් සමාජ සේවා කටයුතුවල ද නිරත වෙමි.

මම විවාහක රූ රැජිණ කිරුළ හිමි කර ගත් පසු මම සම්පූර්ණයෙන් දේශපාලන කටයුතුවලින් ඉවත් වී සිටින අතර කිසිදු දේශපාලන පක්ෂයක් හෝ දේශපාලනඥයෙකු වෙනුවෙන් පෙනී නොසිටින බව ඉතා වගකීමෙන් කියා සිටිමි. මගේ විවාහක රූ රැජිණ කිරුළ ලබාගැනීමෙන් පසු සැමවිටම මුලු රටක් නියෝජනය කරන පුද්ගලයකු වශයෙන් මම ඉතා වගකීමෙන් කටයුතු කරන බව ප්‍රකාශ කර සිටිමි.

නොයෙකුත් අවස්ථාවල මම සහ මගේ පවුලේ අය සම්බන්ධ කොට විකෘති සහ අසත්‍ය ප්‍රවෘත්ති යම් යම් මාධ්‍ය හරහා ප්‍රකාශ කරනු ලැබේ. එමගින් මගේ පෞද්ගලිකත්වයට දැඩි ලෙස හානි සිදුවී තිබේ. මෙවන් අසත්‍ය ප්‍රවෘත්ති ප්‍රචාරය කිරීම මගින් කරන පීඩනය මටත් මගේ දරුවාටත් කිසිසේත්ම දරා ගැනීමට නොහැකි තත්ත්වයක් උද්ගත වී ඇත.

ඒ නිසා මෙවන් අසත්‍ය ප්‍රකාශ නිකුත් කිරීමට පෙර පෞද්ගලිකව මා ගෙන් විමසා හෝ සත්‍ය සාක්ෂි පදනම් කරගෙන එවන් ප්‍රකාශ සිදු කරන්නට අදාළ පාර්ශ්වයන් වගබලා ගන්නේ නම් එය තවත් අයකුගේ පෞද්ගලිකත්වයට ගරු කරන සමස්ත මානව සංහතියටම වැදගත් වනු ඇතැයි මම විශ්වාස කරමි.

ස්තුතියි

– පුෂ්පිකා ද සිල්වා’